مفضلاتي في المكياج || MY MAKE UP FAVORITE

مساء الخير

شخباركم اتمنى تكونون بخير 

تدوينة اليوم مفضلاتي في المكياج و ممكن تحصلون اشياء غير المكياج

يلا نبدأ
.
.
.
.

نبدا بروج من كلارنس  اعشق هالروج  و ما يفارق شنطتي على طول موجود احب لونه واااااايد حلو ناعم صباحي لونه على برتقالي ناعم جدا و مب مطفي فيه لمعه الترطيب و ريحته حلوه جنه حلاوه اسم الدرجه woodrose 13

روج لوليتا LOLITA  من كات فوندي على كثر ماسمعت عنه اخذته فعلا الدرجه حلوه لونه على بني يجنن صح انه مطفي بس ما ينشف الشفايف.

 باليت ظلال العيون  Modern Renaissance  من انستازيا الالوان ترابيه و فيه كم لون بلمعه الفتره الاخيره مكياجي كله من هالباليت اعتقد واضح من اللون البني بدا يختفي ههههههه اكثر لون استخدمه و تقريبا الباليت جامع اغلب الالوان بس ناقصه اللون الاسود. 

بي بي كريم من ديور كتبت عنه تدوينه كامله يعجز لساني عن الكلام اللون و القوام و اللوك النهائي و ريحته كل شي فيه حلوه استبدلته بالفاونديشن للمناسبات الخفيفه و ازيد عليه الكونسيلر و يعطيني تغطيه كافيه .

                                      

بودرة STUDIO FIX من ماك اول مره اشتريها اخذتها على نصيحة دكتور الجلديه لانها مناسبه للبشرات الدهنيه  تمتص الدهون من البشره تغطيتها ثقيله شوي اذا استخدمتها مع الاسفنجه اما اذا ابيها خفيفه استخدم الفرشه تكون خفيفه درجتي NC43.5 جربت درجة NC42  طلعت فاتحه علي اما 43.5 يايه نفس لون بشرتي بالضبط.

ماسكراة Princess Lash من اسينس عجيييييبه تطول الرموش اول مره اجرب ماسكراة تطول كنت بفتره استخدم ماسكرا علاجيه تطول الرموش فرموشي صارت طويله و مع هالماسكرا كملت عليها ما يحتاي احط رموش صناعيه سوادها حلو . 

 مناكير FULL COLOR  من فلومار لون عنابي درجة Penthouse من  اول طبقه واضح في موسم الشتا اكثر لون استخدمته اذا ابا لون اقوي احط طبقتين و يصير اغمج زياده و فرشته عريضه حلوه.

  اهو مب من المكياج بس ما قدرت ما اتكلم عنه عطر نارسيسو للشعر جميييييل ريحته ثقيله شوي بس لما تخطلت مع البخور تصير الريحه احلى و احلى.

المزيد

مفضلاتي لشهر ديسمبر || December Favorite

مساء الخير

شخباركم اتمنى تكونون بخير 

تدوينة اليوم عن مفضلاتي لشهر ديسمبر 

منتجات استخدمتها و رأيي فيها 

يلا نبدأ
.
.
.
.
.

مقشر و غسول The Scrub من  Soap &Glory  

مقشر للجسم  بحبيبات خفيفه يقشر البشره و في نفس الوقت غسول ريحته عجيييبه  

 استخدمه لما ابا اخذ شور سريع منه غسول و منه مقشر للجسم اثنين في واحد يخلي البشره ناعمه .

شامبو و بلسم غارنيه بزيت الاْفوكادو و زبدة الشيا 

شامبو مخصص للشعر شديد الجفاف و المجعد ترطيبه للشعر الكيرلي رووعه خصوصا البلسم 

 الشامبو ينظف بس بلطف ما يعطيج الاحساس انه شعرج ناشف و يخلي الشعر رطب و ناعم  .

لوشن الجسم من نيفيا بزبدة الكاكاو 

اول مره اجربه و كتجربة اولى و قرب انه يخلص ترطيبه جميل مب خفيف و لا ثقيل و ريحته تجنن كاكاو على بودرة اطفال و هو مخصص للبشره الجافه.

معطر الجسم من بودي شوب بزهرة الكرز اليابانيه

ثاني مره اتكلم عنه و الصراحه كل ما خلص اشتري منه ريحته خفيفه و لطيفه احبها .

بودرة دهن العود للجسم من أجمل 

ريحتها خيااال بس ما حسيتها ثابته ابدا يعني ساعه ساعتين عقب تختفي الريحه بس حلوه بعد الشاور و كريم الترطيب ريحة نظافه.

قناع الوجه من هيمالايا  بعشبة النيم و الكركم 

 قناع مخصص للبشره من العاديه الى الدهنيه قوامه طيني فيه حبيبات كبيره احطه مدة ربع ساعه عقب اغسله بماي دافي ريحته حلوه و مب حلوه في نفس الوقت الي احبه فيه انه ينظف البشره احساس جميل عقب هالماسك جي بشرتي نظيفة من قلب  .

قناع الوجه يتقشر بالبرتقال و العسل يزيل الاسمرار 

قناع مخصص لجميع انواع البشره ريحته مزعجه بالنسبه لي  ما لاحظت ابدا تفتيح في البشره  بس احب استخدمة لانه يتقشر فيساعد انه يشيل الشعرالوبري الي في الوجه و يعطي احساس بشرتي نظيفه .

اشوفكم في بوست قريبا بإذن الله

المزيد

مفضلاتي من ماك|| M.A.C Favorite

السلام عليكم شخباركم بوست اليوم عن  

 مفضلاتي من ماك الي دايما تخلص و ارد اشتري منها 

يلا نبدا

.

.

.

.

.

فكس بلس معروف جدا و فيه وايد ماركات عندهم الفيكس بلس احب احطه عقب ما اخلص الميكب و عقبها اطبطب بالبيوتي بلندر 

يعطي لوك ديوي وطبيعي مب مغبر من البودره و الفاونديشن .

إضاءة جلوبل جلو جميله جدا تعطي لمعه حلوه ممكن تخلينها تكون ثقيله و واضحه تزيدين و اذا تبين ممكن خفيفه تعطي لوك ديوي .

كونسيلر برولونغ وبر جميييل ثقيل و تغطيته تعتبر من متوسط لفل كفر و ثابت الدرجه الي عندي افتح شوي من بشرتي استخدمه بعد ما احط الكونسيلر الي بدرجتي  يكون اخر خطوه للتفتيح المنطقه الي تحت العين .

هذا عشقي ثالث علبه اشتريها  كونسيلر بيمينرالز كونسيلر خفيف و يومي تغطيتة من خفيف لمتوسط الدرجه الي عندي قريبه من لون بشرتي الللون مايل على برتقالي فمنه مصحح و منه كونسيلر احطه تحت منطقه العين و اخليه ينشف شوي و عقب اوزعه بالبيوتي بلندر .

فاونديشن ستيدو فيكس استخدمه للمناسبات الكبيره تغطيته من متوسط لفل كفر ثباته حلو يناسب البشرات الدهنيه و الجافه  ترطبين ويهج قبل لا تحطينه لوكه النهائي مطفي تقريبا يمكن ثالث علبه اشتريها منهم احبه هالفاونديشن الدرجه االي عندي شوي يايه على برونز احبها و يايه مع لون بشرتي حلو مب وايد فاتح و لا وايد غامج وسط .

اشوفكم في بوست قريبا بإذن الله

المزيد

تجربتي مع علاج الروكتان للمره الثانيه!! || My Experience With Roaccutan Treatment

السلام عليكم شخباركم ؟ من زمان عن المدونه للامانه كنت مشغوله اخر كم شهر لانه اخر كورس لي في الكليه و مع التدريب و الامتحانات انشغلت و عقب التخرج تكاسلت شوي و كنت مجهز لكم هالموضوع وقلت اخلص الكورس و اقولكم تجربتي بالتفصيل

فتدوينة اليوم بتكون شوي طويله  للمهتمين بعلاج حب الشباب .

دواء الروكتان هو دواء لعلاج حب الشباب الشديد الي بشراتهم ما نفع وياها الكريمات و المضادات الحيويه, ماينصرف الا بوصفه طبيه و اجراء فحوصات قبل العلاج و في كل شهر عشان يشوف الدكتور مستوى الكوليسترول في الدم و وظائف الكبد لانه يأثر عليهم و اكيد هالدواء ماينفع للمرأه الحامل لانه ممكن يسبب تشوهات للجنين ويأثر عليه.

....................................................................................................................................

اولا: اخذت الروكتان في سنة 2014

 كنت اتعالج في مستشفى خاص  اول ما اخذته الدكتوره ما سوت لي الفحوصات وصفت لي الدوا على طول بس بعد كم يوم رحت و سويت الفحوصات و الحمدلله كل شي سليم و عده اول شهر على خير طبعا كنت اخذ الروكتان بس شكل العلبه ثاني يعني نفس مادة الروكتان بس مجرد اختلاف اسماء ادويه بس ثاني شهر وصفت لي الروكتان و هني بدة الرحله صج كنت اخذ جرعه 40 لانه وزني كان 52 بعد ثالث يوم ظهري بدء يعورني عوار فظيع جدا و استغربت من الالم بس يوم رحت موعدي و قلت لها قالت يمكن عظامج خفيف بوصف لج فيتامين دال و اخذت فيتامين د و الحمدلله خف الالم بس كانت مفاصلي دايما تعورني و كنت ماخذته في رمضان و ما كنت اقدر اشتغل في البيت جني عيوز بس الحمدلله عده الكورس بسلام  طلعت لي حبه وحده و كانت كبيره وايد و حمرا فدكتوره بطتها بالابره و حطة عليها لصق جروح بس الين الحين بقى اثر الحفره و كانت اخر حبه تظهر لي من بديت العلاج و استمريت على العلاج لمدة 6 شهور .

الاعراض الجانيه و التغيرات الي صارت لي بعد العلاج :

- خشمي كان ينزف و خصوصا انه عندي حساسيه موسميه للانف فوصفتي لي مرطب للانف و مانفع فقمت ما المس خشمي وايد احاول اتجنب حركة بسيطه ممكن ينزف.

- مفاصلي تعورني خصوصا ركبي.

- اكواعي كانت تتحسس و جافه  في كنت ارطبهم بكريمات ثقيله.

- قبل اخر كورسين الدكتوره كانت تستخدم لي مقشر احماض الفواكه في كل زيارة فويهي كان يتقشر و يصير ناعم.

- بشرتي صارت فاتحه شوي. 

- الحبوب قلت وااايد تقريبا اختفت تماما.

- شفايفي صارت ورديه.

- خشمي صار نحيف شوي.

- تغيير ملحوظ في بشرتي صارت ناعمه خاليه من الحبوب.

................................................................................................................................

في سنة 2016 بدت الحبوب ترد لي حبوب حمرا و صغيره سويت لي موعد في عياده الجلديه حكوميه  قالت لي دامج خذتي كل العلاجات و المراهم و مانفعتج مالج الا تردين للروكتان مره ثانيه وصفتلي التحاليل الي اسويها و سويت لي موعد و قالت رديلي اذا حابه تاخذين العلاج الصراحه خفت اني ارد للدوا مره ثانيه خصوصا انه اعراضه الجانبيه متعبه شوي قلت اقري يا بنت عقب قرري قريت و قريت و طلع انه في بعض الحالات الكورس يكون مب كافي فيضطرون يعطونهم العلاج بشكل مخفف على مدى كم شهر بجرعات مخففه عشان تعالج الحبوب و اخيرا استخرت و توكلت على الله و اخذت الدوا و الحمدلله ردت بشرتي صافيه. 

(الشهر الاول جرعه 30 وزني 49)

جفاف الشفايف 

جفاف الوجه 

جفاف الانف

الشفايف صارت ورديه جني حاطه روج

طلعت لي حبه كبيره صوب رقبتي و كانت مؤلمه استخدت المحلول عقب كم يوم خفت.

 (الشهر الثاني جرعة 30 )

جفاف الوجه

جفاف الشفايف

ويهي صار وردي و حساس

حبوب مازالت مستمره بس استخدم عليها محلول زنيرايت يوم يومين وتخف

هالفتره عندي مناسبات وايد فما اقدر احط ارواج المات تشقق شفايفي حتى لو رطبت قبل ما احط فا اعتمدت على ارواج قلوسيه او احط المات و عقب القلوس فوقه اكتشفت انه يحافظ على شفايفي تتم رطبه .

(الشهر الثالث جرعة 30 )

الجفاف مستمر

جفاف العين 

طلعت لي حبه وحده 

اقشر ويهي بلطف عند الاستحمام بشرتي تكون رطبه فتطلع القشور الي في ويهي.

(الشهر الرابع جرعة 30)

جفاف الوجه

جفاف الشفايف

جفاف العيون يوم انسى ارطب عيوني و احط القطره عيوني اشوي تحرقني.

(الشهر الخامس جرعة 30)

جفاف الوجه

جفاف الشفايف

جفاف العيون مع دخول الصيف زاد.

(الشهر السادس جرعة 30)

جفاف الوجه 

جفاف العيون

جفاف الشفايف

طلعت لي حبتين في ويهي حطيت المحلول يومين وراحوا.

(الشهر السابع جرعة 30)

جفاف الوجه

جفاف العيون

جفاف الشفايف

................................................................................................................................

المنتجات الي كنت استخدمها:

  

دواء الروكتان حبتين يوميا وحده 10 غرام و الثانيه 20 غرام اخذهم دفعة وحده.

                   

كريم المرطب دوكستيان ترطيبه عميق وثقيل احطه مرتين يوميا.

 كريم مرطب بيبانثين غني عن التعريف وصفته لي في اخر شهر من الكورس شكله مخلص من الصيدليه مرطب دوكستيان المرطب خفيف و يخلي البشره ناعمه احطه مرتين.

كريم مرطب نوترادم كنت استخدمه من بدايات رحلتي في علاج حب الشباب و كنت اجرب كريمات ثانيه و ارد له بس مع الروكتان مفعوله خفيف لانه الجفاف شديد فأخلطه مع كريم دوكستيان.

   واقي الشمس ما استغنى عنه اذا بطلع في النهار نسبته 30 % احبه خفيف. 

 محلول زينيرايت محلول بودر و سائل ينخلط مع بعض احطه على الحبه اذا طلعت لي مرتين يوميا الين تختفي الحبه.

                                             قطرة العيون احطها اكثر من ثلاث مرات في اليوم. 

 مرطبات ميبلين بي بي ليبس للشفايف استخدمها خلال النهار تحتوي على واقي شمس 30% و بليل احط فازلين.

المزيد

Review Dior BB Cream || ريفيو بي بي كريم ديور

السلام عليكم شحالكم ؟ اتمنى تكونون بخير 

بوست اليوم بيكون عن بي بي كريم استخدمته من فتره و حبيته

شنو مكونات البي بي كريم BB Cream  

البي بي كريم  يجمع بين (الفاونديشن و المرطب و  فيه حمايه من الشمس SPF)

و هي اختصار لكلمة Beauty Balm 

و اغلب الماركات عندها بي بي كريم سواء الماركات الكبيره او الدرق ستور الماركات الصغيره  

جربت بي بي كريم من ميبلين و غارنيه و ريميل بس و لا واحد ناسبني من ناحيه اللون يا فاتح و يقلب رمادي او غامج جني مسويه تان 

(  Hydra Life Dior BB Cream )

اول شي بتكلم عن شكله  أنيق و لون العلبه حلو حجم العلبه 50مل وايد صغير بالنسبه لسعره الحلو فيه انه فيه بمب (عصاره)

المنتج يوعد بأنه يرطب و يحمي البشره من الشمس لانه نسبة الحمايه فيه SPF 30

تعتبر نسبه جيده بالنسبه لشمسنا في الخليج  

   واحد من مكوناته يحتوي على الروز الاسود الي يؤخر ظهور علامات الشيخوخه  

  و اتوقع هو السبب الرئيس لريحته الجميله

له ثلاث درجات

 Luminous Beige -  (فاتح)

 Golden Peach - (متوسط)

 Sunny Amber -(غامج)

مناسب لجميع انواع البشره 

طريقتي في استخدامه:

بشرتي مختلطه بين الدهنيه و الجافه يعني مناطق التي زون الي الجبهه و الانف و الذقن يدهنون و احيانا الخدود تدهن باقي الويه جاف 

بشرتي معرضه للحب الشباب يعني كل يومين تطلع حبه يديده فما ركزت اذا طلعت لي حبوب من الكريم و لا لا بس ماحسيت ضر بشرتي بالعكس حسيته اخف من الفاونديشن و مايكتم البشره.

بعد ما ارطب ويهي و احط الكونسيلر لتغطيه اكثر اوزعه بالبيوتي بلندر و عقب لوس باودر ع الكونسيلر لانه مايحتاي هو مطفي  تغطيته نعتبر متوسطه و قابله للبناء يعني ممكن تحطين اكثر طبقه 

 اول ما يندمج مع البشره يتحول بودر مطفي يعطي لوك مات بس مب الي ناشف 

الدرجه الي عندي اغمج درجه Sunny Amber لوني حنطي فاخذت هالدرجه لانه المتوسطه فاتحه علي و ممكن تقلب رمادي يمكن تشوفونها وايد غامجه بس لما يندمج مع البشره يعطي لون حلو يوم احطه خواتي يسألوني اي فاونديشن مستخدمه اللوك النهائي حلو يعطي شكل حلو للبشره ...

اتمنى انكم استفدتوا من البوست

تسعدني تعليقاتكم    

  

المزيد

Masks Review || ماسكات استخدمتها الفتره الاخيرة...

السلام عليكم اشحالكم؟ اتمنى تكونون بخير بوست اليوم بيكون ريفيو عن الماسكات الي استخدمتها لبشرتي الفتره الاخيره ...

ماسك GLYCOLIC PEEL من ماركة CAUDLIE/ كودالي هالماسك كان هديه من سيفورا عشان وصلت 200 نقطه للبطاقه سيفورا السوده  حجمه كبير 75مل لجميع انواع البشره الماسك يوعد انه ينعش البشره و يفتحها و يوحد لونها استخدمه مره في الاسبوع الي لاحظته انه بشرتي تصير ناعمه عقبه نعومه حلوه و ترطيب  ما لاحظة اي تفتيح الحلو فيه انه ناعم و خفيف ع البشره حتى ملمسه ناعم طبيعة الماسك انه ما ينشف يعني عقب ما احطه يتم رطب حتى عقب 10 دقايق تحصلونه في سيفورا.

ماسك العيون من CLARINS هالماسك ياني ويا مجموعه من منتجات كلارنس غسول بشره و مزيل ميكب و ماسك للعيون هديه سيفورا بمناسبه وصلي لـ 200 نقطه الماسك يوعد بترطيب و تنعيم المنطقه الي تحت العين احطه و اتركه 10 -5 دقايق اول مرتين استخدمته حسيت بوخز خفيف بس عقب راح ما لاحظة اي شي غير النعومه يعني عادي جدا لا نفع وايد و لا ضرني تحصلونه في سيفورا او باريس غاليري الحجم الي عندي اتوقع عينه .

ماسك الطين من بودي شوب SEAWEED هالماسك مخصص للبشره الدهنيه و المختلطه  يوعد انه يتحكم في افراز الدهون  انا بشرتي مختلطه و ناسبني جدا من مكوناته الطين و غني بالمعادن ينحط على البشره نظيفه و نتركه 10 دقايق طريقتي في استخدامه اقشر ويهي بسنفره سانت ايفز و احطه افضل احط الماسك بعد السنفره عشان مسامات البشره تكون مفتوحه و البشره تستقبل الماسك ريحته طين , تراب احيانا اتضايق من ريحته الي لاحظته انه بشرتي صارت نظيفه و بالنسبه للدهون بشرتي مب وايد تفرز دهون فما لاحظة تغيير في الدهون استخدمه مره في الاسبوع او مرتين طبعا تحصلونه في محلات ذا بودي شوب.

ماسك MUNG BEAN SHEET من ذا فيس شوب اغلب الماسكات الي تكون في ورقه نتيجتها تكون مؤقته يعني في نفس اليوم او اليوم الي عقبه اذا عندج مناسبه حلو لو تحطينه قبل المناسبه الماسك يوعد بتنعيم و تنظيف المسامات و البشره طريقتي في استخدامه عقب السنفره احطه اتركه 10 دقايق و عقب اشيله و بيتم بقايه للماسك اسوي مساج لبشرتي الين ما تروح البقايا الي لاحظته ينعم البشره  طبعا كنت شاريه مجموعه من الماسكات الورق قبل احطهم وقت ما ابي ادلع نفسي قبل لا استخدمهم احفظهم في الثلاجه عشان يوم احطه يكون بارد و منعش احساس حلو.

اتمني انكم استفدتوا من البوست تسعدني تعليقاتكم

  

المزيد

تجربتي في الطلب من موقع سوق دوت كوم!!

السلام عليكم مبارك عليكم ما تبقى من الشهر ادري متأخره بس انشغلت بالامتحانات الصيفي المهم اليوم وصلت طلبيتي من موقع سوق دوت كوم و فكرت اني انزل بوست  عن تجربتي في هالموقع خصوصا انه صار من المواقع الي ما استغنى عنها و بذكر ايجابيات و سلبيات الموقع و كيفية الطلب 

بسم لله نبدأ

 طبعا الكل يعرف هالموقع من كثر ما تطلع اعلاناته في كل مكان ,موقع سوق دوت كوم هو اكبر موقع للتجاره الالكترونيه في العالم العربي و يضم أكثر من 4000000 منتج من مختلف الفئات الالكترونيات و الازياء و الساعات و العطور و غيرها...

يسمى الموقع بأمازون الشرق الاوسط لانه يشبه في طريقة موقع امازون الامريكي و فيه اكثر من بائع و مختلف الاسعار تتراوح من الغالي الى المنخفض على حسب البائع ...

ايجابيات الموقع :

* سرعة وصول الشحنه مع بعض البائعين 

*الرد على الاستفسارات سريعا 

*وجود خدمة الدفع عند الاستلام وهاي ميزه حلوه للي ما عندهم كرديت كارد

*كل شي يخطر في بالكم موجود في الموقع 

*يوصلون الين باب بيتكم ما يحتاي تستلمون الشحنه من شركة الشحن

*خدمة الاستبدال خلال 14 يوم و استعادة المبلغ و ينحط في رصيدج في الموقع او ممكن تسحبين المبلغ و تطرشينه على حسابج في البنك  

سلبيات الموقع:

*عدم وجود خاصيه تجميع الشحنات يعني مثلا اطلب اكثر من منتج و يكون من مختلف البائعين و كل واحد بيوصلني بوقت معين و استلم الشحنه على شكل دفعات 

*بعض البائعين اسعارهم تكون أعلى بزياده عن السعر الاصلي للمنتج

*بعض البائعين يوصلون منتج غير عن الي طلبته وصارت كم مرتين معاي

هل انصح بطلب منه او لا ؟

تبون الصج على عيوبه على اني ما استغنى عنه هالموقع كل شي فيه و خصوصا اسعاره حلوه و عروضاتهم الي يسونها حلوه اخذت كم شغله من عندهم وقت العروضات بسعر خيالي و الجوده تمام حتى الضمان يكون عليهم اول سنه للاكترونيات مضمون 

بس صار لي كم موقف وياهم اول موقف طلبت فرش ري تكنيك للعين و وصلت لي الشحنه غلط تواصلت وياهم و رديت المنتج و استسموحوا لي و ردوا المبلغ في حسابي عندهم ثاني موقف نفس الشي طلبت فيامين E و سيريوم فيتامين C  وصل لي 2 من فيامين E انصدمت لانه كنت متحمسه على فيتامين C  في نفس اليوم اتصلت فيهم و قالوا غلطت البائع عقب كم يوم شركة الشحن تواصلت وياي و اخذت المنتج تريت كم يوم قلت الين ما يتأكد البائع من المنتج مب مستخدم اتصلت فيهم عشان يردون المبلغ لي قالوا اوك بنكلم البائع و عقب 24 ساعه بيكون المبلغ في رصيدج و تريت 4 ايام انشغلت وعقب شفت المبلغ مب موجود و عقب اتصلت مره ثانيه و بعدها بكم يوم لقيت المبلغ في رصيدي , اضافوا خاصيه جديد و هي الشراء الفوري و مره بالغلط ضغط عليها و انا ما ابي اشتري المنتج نفس اليوم اتصلت فيهم يكنسلونها هي حلوه للي يبي يشتري بسرعه و مب حلوه لانه ممكن بالغلط تشتري شي و انت ما تباه و لازم تتواصل وياهم عشان يكنسلونها.  

طريقة الطلب :

اول شي كأي موقع نفتح اكاونت عندهم و نحط البيانات و رقم  الهاتف الشخصي و الايميل و عنوان الشحن

عقب  اتسوق و اختار المنتج الي بشتريه 

اضافوا خاصيه جديده و هي الشراء الفوري يختار طريقة الدفع عند الاستلام و يحسب كم المبلغ و يطلع لج و على طول يوصل مسج لتلفونج و ايميل بتأكيد الطلب او ممكن تحطينه على العربه و تكملين التسوق 

اضغط تابع عميلة الشراء

يطلع لي طريقة الدفع اخترت الدفع عند الاستلام رسومها 4 دراهم و رسوم شركة الشحن 12 درهم يعني صار 16 درهم زياده على سعر المنتج اضغط تأكيد الطلب و يوصل لي ايميل بتأكيد الطلب و اذا انشحن الطلب بيطرشون ايميل تتبع الشحنه و عقب يطرشون مسج انه الشحنه سوف يتم تسليمها اليوم مثلا عقب يتواصل وياج مندوب الشركه تقولين له العنوان اغلبهم يتكلمون عربي و نادر يتكلمون انجليزي احيانا شركة الشحن يتصلون يأكدون على العنوان و يقولون لج متى بتوصل الشحنه التاريخ بالضبط.

نشوف الطلبيه الي طلبتها 

طلبت يوم الخميس و انشحنت الطلبيه يوم الاحد و استلمتها يوم الاثنين  احيانا يوصلون يوم السبت بس الجمعه اجازه

طلبت سيريوم حمض الهيدروليك من شركة اوز ناشورلز من مكوناته فيتامين E و فيتامين C و الشاي الاخضر و ورد المسك

قرأت ريفيوز وايد عنه و شفت في اليوتيوب وايد ناس حبوه و ينصحون فيه 

و بعد وايد ناس تكلموا عنه في الانستقرام و تحمست اجربه خصوصا انه له فوائد وايد منها :

* يرطب البشره و يساعد على امتصاص كريم المرطب بشكل اسرع و يحافظ على البشره رطبه

*يحافظ على شكل البشره و يخليها صحيه

*يقلل من الخطوط و التجاعيد عن طريق تحفيز الكولاجين 

طريقة الاستخدام :

بعد استخام غسول الوجه ننشف البشره و عقب نحط كم قطره منه و نحطه بطريقه الطبطبه مب دهن نخليه الين ما ينشف عقب نحط كريم المرطب الي متعودين عليه و ممكن بعد يستخدم قبل المكياج و للحصول على افضل النتائج يستخدم يوميا مره واحده قبل النوم اول اسبوعين عقب مرتين يوميا. 

طبعا عقب ما اجربه بنزل عنه ريفيوز 

ان شاء الله حبيتوا بوست اليوم 

تسعدني تعليقاتكم

XOXO

   

  

المزيد