Review Dior BB Cream || ريفيو بي بي كريم ديور

السلام عليكم شحالكم ؟ اتمنى تكونون بخير 

بوست اليوم بيكون عن بي بي كريم استخدمته من فتره و حبيته

شنو مكونات البي بي كريم BB Cream  

البي بي كريم  يجمع بين (الفاونديشن و المرطب و  فيه حمايه من الشمس SPF)

و هي اختصار لكلمة Beauty Balm 

و اغلب الماركات عندها بي بي كريم سواء الماركات الكبيره او الدرق ستور الماركات الصغيره  

جربت بي بي كريم من ميبلين و غارنيه و ريميل بس و لا واحد ناسبني من ناحيه اللون يا فاتح و يقلب رمادي او غامج جني مسويه تان 

(  Hydra Life Dior BB Cream )

اول شي بتكلم عن شكله  أنيق و لون العلبه حلو حجم العلبه 50مل وايد صغير بالنسبه لسعره الحلو فيه انه فيه بمب (عصاره)

المنتج يوعد بأنه يرطب و يحمي البشره من الشمس لانه نسبة الحمايه فيه SPF 30

تعتبر نسبه جيده بالنسبه لشمسنا في الخليج  

   واحد من مكوناته يحتوي على الروز الاسود الي يؤخر ظهور علامات الشيخوخه  

  و اتوقع هو السبب الرئيس لريحته الجميله

له ثلاث درجات

 Luminous Beige -  (فاتح)

 Golden Peach - (متوسط)

 Sunny Amber -(غامج)

مناسب لجميع انواع البشره 

طريقتي في استخدامه:

بشرتي مختلطه بين الدهنيه و الجافه يعني مناطق التي زون الي الجبهه و الانف و الذقن يدهنون و احيانا الخدود تدهن باقي الويه جاف 

بشرتي معرضه للحب الشباب يعني كل يومين تطلع حبه يديده فما ركزت اذا طلعت لي حبوب من الكريم و لا لا بس ماحسيت ضر بشرتي بالعكس حسيته اخف من الفاونديشن و مايكتم البشره.

بعد ما ارطب ويهي و احط الكونسيلر لتغطيه اكثر اوزعه بالبيوتي بلندر و عقب لوس باودر ع الكونسيلر لانه مايحتاي هو مطفي  تغطيته نعتبر متوسطه و قابله للبناء يعني ممكن تحطين اكثر طبقه 

 اول ما يندمج مع البشره يتحول بودر مطفي يعطي لوك مات بس مب الي ناشف 

الدرجه الي عندي اغمج درجه Sunny Amber لوني حنطي فاخذت هالدرجه لانه المتوسطه فاتحه علي و ممكن تقلب رمادي يمكن تشوفونها وايد غامجه بس لما يندمج مع البشره يعطي لون حلو يوم احطه خواتي يسألوني اي فاونديشن مستخدمه اللوك النهائي حلو يعطي شكل حلو للبشره ...

اتمنى انكم استفدتوا من البوست

تسعدني تعليقاتكم    

  

المزيد

Masks Review || ماسكات استخدمتها الفتره الاخيرة...

السلام عليكم اشحالكم؟ اتمنى تكونون بخير بوست اليوم بيكون ريفيو عن الماسكات الي استخدمتها لبشرتي الفتره الاخيره ...

ماسك GLYCOLIC PEEL من ماركة CAUDLIE/ كودالي هالماسك كان هديه من سيفورا عشان وصلت 200 نقطه للبطاقه سيفورا السوده  حجمه كبير 75مل لجميع انواع البشره الماسك يوعد انه ينعش البشره و يفتحها و يوحد لونها استخدمه مره في الاسبوع الي لاحظته انه بشرتي تصير ناعمه عقبه نعومه حلوه و ترطيب  ما لاحظة اي تفتيح الحلو فيه انه ناعم و خفيف ع البشره حتى ملمسه ناعم طبيعة الماسك انه ما ينشف يعني عقب ما احطه يتم رطب حتى عقب 10 دقايق تحصلونه في سيفورا.

ماسك العيون من CLARINS هالماسك ياني ويا مجموعه من منتجات كلارنس غسول بشره و مزيل ميكب و ماسك للعيون هديه سيفورا بمناسبه وصلي لـ 200 نقطه الماسك يوعد بترطيب و تنعيم المنطقه الي تحت العين احطه و اتركه 10 -5 دقايق اول مرتين استخدمته حسيت بوخز خفيف بس عقب راح ما لاحظة اي شي غير النعومه يعني عادي جدا لا نفع وايد و لا ضرني تحصلونه في سيفورا او باريس غاليري الحجم الي عندي اتوقع عينه .

ماسك الطين من بودي شوب SEAWEED هالماسك مخصص للبشره الدهنيه و المختلطه  يوعد انه يتحكم في افراز الدهون  انا بشرتي مختلطه و ناسبني جدا من مكوناته الطين و غني بالمعادن ينحط على البشره نظيفه و نتركه 10 دقايق طريقتي في استخدامه اقشر ويهي بسنفره سانت ايفز و احطه افضل احط الماسك بعد السنفره عشان مسامات البشره تكون مفتوحه و البشره تستقبل الماسك ريحته طين , تراب احيانا اتضايق من ريحته الي لاحظته انه بشرتي صارت نظيفه و بالنسبه للدهون بشرتي مب وايد تفرز دهون فما لاحظة تغيير في الدهون استخدمه مره في الاسبوع او مرتين طبعا تحصلونه في محلات ذا بودي شوب.

ماسك MUNG BEAN SHEET من ذا فيس شوب اغلب الماسكات الي تكون في ورقه نتيجتها تكون مؤقته يعني في نفس اليوم او اليوم الي عقبه اذا عندج مناسبه حلو لو تحطينه قبل المناسبه الماسك يوعد بتنعيم و تنظيف المسامات و البشره طريقتي في استخدامه عقب السنفره احطه اتركه 10 دقايق و عقب اشيله و بيتم بقايه للماسك اسوي مساج لبشرتي الين ما تروح البقايا الي لاحظته ينعم البشره  طبعا كنت شاريه مجموعه من الماسكات الورق قبل احطهم وقت ما ابي ادلع نفسي قبل لا استخدمهم احفظهم في الثلاجه عشان يوم احطه يكون بارد و منعش احساس حلو.

اتمني انكم استفدتوا من البوست تسعدني تعليقاتكم

  

المزيد

تجربتي في الطلب من موقع سوق دوت كوم!!

السلام عليكم مبارك عليكم ما تبقى من الشهر ادري متأخره بس انشغلت بالامتحانات الصيفي المهم اليوم وصلت طلبيتي من موقع سوق دوت كوم و فكرت اني انزل بوست  عن تجربتي في هالموقع خصوصا انه صار من المواقع الي ما استغنى عنها و بذكر ايجابيات و سلبيات الموقع و كيفية الطلب 

بسم لله نبدأ

 طبعا الكل يعرف هالموقع من كثر ما تطلع اعلاناته في كل مكان ,موقع سوق دوت كوم هو اكبر موقع للتجاره الالكترونيه في العالم العربي و يضم أكثر من 4000000 منتج من مختلف الفئات الالكترونيات و الازياء و الساعات و العطور و غيرها...

يسمى الموقع بأمازون الشرق الاوسط لانه يشبه في طريقة موقع امازون الامريكي و فيه اكثر من بائع و مختلف الاسعار تتراوح من الغالي الى المنخفض على حسب البائع ...

ايجابيات الموقع :

* سرعة وصول الشحنه مع بعض البائعين 

*الرد على الاستفسارات سريعا 

*وجود خدمة الدفع عند الاستلام وهاي ميزه حلوه للي ما عندهم كرديت كارد

*كل شي يخطر في بالكم موجود في الموقع 

*يوصلون الين باب بيتكم ما يحتاي تستلمون الشحنه من شركة الشحن

*خدمة الاستبدال خلال 14 يوم و استعادة المبلغ و ينحط في رصيدج في الموقع او ممكن تسحبين المبلغ و تطرشينه على حسابج في البنك  

سلبيات الموقع:

*عدم وجود خاصيه تجميع الشحنات يعني مثلا اطلب اكثر من منتج و يكون من مختلف البائعين و كل واحد بيوصلني بوقت معين و استلم الشحنه على شكل دفعات 

*بعض البائعين اسعارهم تكون أعلى بزياده عن السعر الاصلي للمنتج

*بعض البائعين يوصلون منتج غير عن الي طلبته وصارت كم مرتين معاي

هل انصح بطلب منه او لا ؟

تبون الصج على عيوبه على اني ما استغنى عنه هالموقع كل شي فيه و خصوصا اسعاره حلوه و عروضاتهم الي يسونها حلوه اخذت كم شغله من عندهم وقت العروضات بسعر خيالي و الجوده تمام حتى الضمان يكون عليهم اول سنه للاكترونيات مضمون 

بس صار لي كم موقف وياهم اول موقف طلبت فرش ري تكنيك للعين و وصلت لي الشحنه غلط تواصلت وياهم و رديت المنتج و استسموحوا لي و ردوا المبلغ في حسابي عندهم ثاني موقف نفس الشي طلبت فيامين E و سيريوم فيتامين C  وصل لي 2 من فيامين E انصدمت لانه كنت متحمسه على فيتامين C  في نفس اليوم اتصلت فيهم و قالوا غلطت البائع عقب كم يوم شركة الشحن تواصلت وياي و اخذت المنتج تريت كم يوم قلت الين ما يتأكد البائع من المنتج مب مستخدم اتصلت فيهم عشان يردون المبلغ لي قالوا اوك بنكلم البائع و عقب 24 ساعه بيكون المبلغ في رصيدج و تريت 4 ايام انشغلت وعقب شفت المبلغ مب موجود و عقب اتصلت مره ثانيه و بعدها بكم يوم لقيت المبلغ في رصيدي , اضافوا خاصيه جديد و هي الشراء الفوري و مره بالغلط ضغط عليها و انا ما ابي اشتري المنتج نفس اليوم اتصلت فيهم يكنسلونها هي حلوه للي يبي يشتري بسرعه و مب حلوه لانه ممكن بالغلط تشتري شي و انت ما تباه و لازم تتواصل وياهم عشان يكنسلونها.  

طريقة الطلب :

اول شي كأي موقع نفتح اكاونت عندهم و نحط البيانات و رقم  الهاتف الشخصي و الايميل و عنوان الشحن

عقب  اتسوق و اختار المنتج الي بشتريه 

اضافوا خاصيه جديده و هي الشراء الفوري يختار طريقة الدفع عند الاستلام و يحسب كم المبلغ و يطلع لج و على طول يوصل مسج لتلفونج و ايميل بتأكيد الطلب او ممكن تحطينه على العربه و تكملين التسوق 

اضغط تابع عميلة الشراء

يطلع لي طريقة الدفع اخترت الدفع عند الاستلام رسومها 4 دراهم و رسوم شركة الشحن 12 درهم يعني صار 16 درهم زياده على سعر المنتج اضغط تأكيد الطلب و يوصل لي ايميل بتأكيد الطلب و اذا انشحن الطلب بيطرشون ايميل تتبع الشحنه و عقب يطرشون مسج انه الشحنه سوف يتم تسليمها اليوم مثلا عقب يتواصل وياج مندوب الشركه تقولين له العنوان اغلبهم يتكلمون عربي و نادر يتكلمون انجليزي احيانا شركة الشحن يتصلون يأكدون على العنوان و يقولون لج متى بتوصل الشحنه التاريخ بالضبط.

نشوف الطلبيه الي طلبتها 

طلبت يوم الخميس و انشحنت الطلبيه يوم الاحد و استلمتها يوم الاثنين  احيانا يوصلون يوم السبت بس الجمعه اجازه

طلبت سيريوم حمض الهيدروليك من شركة اوز ناشورلز من مكوناته فيتامين E و فيتامين C و الشاي الاخضر و ورد المسك

قرأت ريفيوز وايد عنه و شفت في اليوتيوب وايد ناس حبوه و ينصحون فيه 

و بعد وايد ناس تكلموا عنه في الانستقرام و تحمست اجربه خصوصا انه له فوائد وايد منها :

* يرطب البشره و يساعد على امتصاص كريم المرطب بشكل اسرع و يحافظ على البشره رطبه

*يحافظ على شكل البشره و يخليها صحيه

*يقلل من الخطوط و التجاعيد عن طريق تحفيز الكولاجين 

طريقة الاستخدام :

بعد استخام غسول الوجه ننشف البشره و عقب نحط كم قطره منه و نحطه بطريقه الطبطبه مب دهن نخليه الين ما ينشف عقب نحط كريم المرطب الي متعودين عليه و ممكن بعد يستخدم قبل المكياج و للحصول على افضل النتائج يستخدم يوميا مره واحده قبل النوم اول اسبوعين عقب مرتين يوميا. 

طبعا عقب ما اجربه بنزل عنه ريفيوز 

ان شاء الله حبيتوا بوست اليوم 

تسعدني تعليقاتكم

XOXO

   

  

المزيد

فستان واحد بتنسيقين مختلفين /One Dress Tow Different Style

السلام عليكم شحالكم ؟ و اخيرا خلصت فترة الامتحانات و تفيجت للتدوين 

و انا افكر في بوست اليوم يت في بالي وايد افكار كنت حابه احط تنسيق واحد بس قلت استفيد من القطعه في تنسيق ثاني 

التنسيقين استخدمت فيهم نفس الفستان و الكعب.  

اخليكم مع الصور 

التنسيق الاول الفستان مطاط وضيق على الجسم يوصل الين تحت الركبه بشوي حبيت لونه وايد حلو اخضر غامج بس في الصوره مع الاضاءه مبين افتح اخترت لون الكعب يكون نود و الكلاتش ذهبيه ميتالك و  لبست هالتنسيق في اخر عرس حضرته . 

الفستان : فوريفرا21

الكعب: تشارليز اند كيث 

الكلاتش: بيدرو

التنسيق الثاني  نفس الفستان بس مع التنوره  طلبت التنوره و توهقت اي توب ينفع وياها  مثل ما تشوفون فيها وايد الوان و بالصدفه اختي شرت الي الفستان الاخضر و قلت اجرب وياه  بما انه نفس درجة اللون الاخضر الحمدلله ضبط اتشققت من الوناسه و اخيرا بلبس هالتنوره  طبعا الفستان اطول من التنوره فرفعت الفستان بحيث انه مايبين و الكعب نود ماغيرته .

الفستان : فوريفرا21

التنوره: ماركه في اي بي Marka VIP

الكعب: تشارليز اند كيث

ان شاء الله حبيتوا بوست اليوم 

تسعدني تعليقاتكم

XOXO

المزيد

مفضلاتي العشوائيه My Random Favorites

السلام عليكم شحالكم؟ في الفتره الاخيره جربت كم منتج و حبيتهم في هالبوست بتكلم عنهم منها للبشره و منها مكياج و اشياء عشوائيه اخليكم مع الصور .

الذوق ليس وسيلة لكسب المال,او دربا للوصل لأعلى المناصب,

بل هو حالة من السمو و الجمال يرتقي بها الانسان صاحب الذوق 

الى مرتبة عاليه في سلم الانسانيه.

اول شي بتكلم عنه كتاب ذوقيات لأناقة الروح و السلوك للكاتب السعودي د.خالد بن صالح المنيف اشمل دليل عربي في فن الاتكيت الكتاب يتكلم عن نصائح في الذوق و الاتكيت في جميع المجلات مثال:ذوقيات المجامله, ذوقيات الاناقه, ذوقيات السفر .....
الي حبيته في الكتاب انه بسيط جدا و مب معقد يوصل لج المعلومه بطريقه سهله اخذته من مكتبة جرير .

سيروم الشعر من فاتيكا حامي للحراره و في نفس الوقت يرطب الشعر بعد السشوار و يعطي لمعه طبيعيه حلوه و ريحته حلوه بالياسمين ملمسه مب زيتي ما ادري كيف اوصف ملمسه ناعم و مايلصق في الشعر يجنن انا استخدمه عقب السشوار و الفير او السيراميك احط منه شويه في راحة يدي و افركه الين ما تصير اديني دافيه عقب احطه في شعري للاطراف وكل الشعر بس ما اكثر شريته من كارفور.

عطر للجسم و عطر عادي من مجموعة ازهار الكرز اليابانيه Japanese Cherry Blossom من ذا بودي شوب  للامانه عندي المجموعه كامله اللوشن و الشاور جل و عطر للجسم و عطر بس جربت العطرين و الشاور جل ما حبيت الشور جل ريحته حلوه و عقب تصير بايخه مب نفس العطر خفيف و حلو ناعم ينفع للصبح ريحته انتعاش و نظافه .

روجين من ويت اند وايلد wet n wild اول مره اجربهم على كثر ما سمعت عنهم تحمست اجربهم و بالصدفه لقيت ستاندwet n wild  في فيرجن ياس مول ثباتهم حلو و تصبغ في شفايف حتى عقب الاكل يخف شوي بس مايروح بسهوله قبل لا اصور سويت سواتش على يدي وبالغلط انمسح في ثوبي عقب غسلت يدي بالماي و الصابون فركة يدي الين ما راح اخترت لونين واحد قريب للوردي و الثاني لونه على درجات العنابي. 

 يبتلكم سواتش من قوقل الصوره الاول اسمه Wine Room

  يبتلكم سواتش من قوقل الصوره الثانيه اسمه Mauve Outta Here

سنفرة كريم كاب للجسم و في منها للوجه غنيه عن التعريف سمعت عنها وايد وايد في الانستقرام عليها مدح وايد هي سنفرت كريميه فيها حبيبات بسيطه للتقشير من فوايدها انها تقشر الخلايا الميته و طبعا يوم نقشر بشرتنا بتجدد الخلايا و يفتح اللون استخدمتها صارلي اكثر من شهر حسيت بفرق وايد  حسيتها سهله ما يحتاي تفركين بحماس فرك خفيف بشكل دائري  و يطلع الجلد الميت احطها على جسم ناشف ما ينفع جسمج يكون مبلول لازم ناشف عشان تشتغل السنفره مفعولها قريب من الحمام المغربي بالنسبه لي و عشان تبان النتيجه لازم تستمرين عليها.

سنفرة القدم من ذا بودي شوب بالنعناع وايد احبها حبيباتها خفيفه و تساعد على تقشير باطن القدم و الحلو فيها انه تحسين بانتعاش بعدها احطها بعد ما ابلل قدمي و تكون رطبه جاهزه للتقشير.

سنفرة للوجه من سات ايفز بالمشمش حبيباتها خفيفه على البشره و تقشر الخلايا الميته احطها عقب ما ابلل ويهي شوي او احيانا استخدمها و ويه ناشف بدون ما ابلله استخدمها مرتين في الاسبوع طلبتها من سوق دوت كوم لانه قبل كانت متوفره في اللولو و الصيدله  عقب انقرضت الحمدلله لقيتها تكلمت عنها بالتفصيل في بوست روتيني في عنايتي في البشره .

و اخيرا الشي الي طايحه في هالفتره  بودرة هوت شوكلت تجنن تجنن لمحبي الهوت شوكلت اتوقع بتحبونها احطها مع حليب حار بدون سكره لانه هي فيها سكر ما يحتاي احط ظرفين في الكوب الواحده طعمه يكون اقوي شوكلت صح اخذتها من كارفور بالصدفه اختي شافتها وقالت نجربها ادمنا عليها في منها اظرف و في علبه كبيره .

اتمنى استفدتوا من البوست لا تنسون تشاركوني بتعليقاتكم الجميله

 XOXO 

المزيد

بلوزه بيضاء بثلاث تنسيقات مختلفه / White Blouse

السلام عليكم شحالكم؟ بوست اليوم بيكون عن شي موجودة في خزانة كل بنت لانه يعتبر من الاشياء الاساسيه الي ممكن نطلع فيها بأكثر من تنسيق الي هي البلوزه البيضاء بأكمام طويله جنها مالت مريول المدرسه في هالبوست بعطيكم ثلاث تنسيقات ممكن تطلعينها بالبلوزه البيضاء ما اطول عليكم اخليكم مع الصور

 التنسيق الاول 

في هالتنسيق  حبيته يكون جدا بسيط و عملي في نفس الوقت  اضفة العقد الذهبي يعطي شكل جميل و تقدرين تلبسين معاه كعب عالي يعطي أناقه اكثر الي فالصوره بدون عقد و لون الجينز اسود ممكن تفتحين الياقه للبلوزه و يكون العقد على داخل بعد حلو 

التنسيق الثاني

هالتنسيق حبيت يكون اكثر اناقه و ممكن انه تلبس البلوزه مع تنوره مخططه او ساده بس تكون نفس القصه الوسيعه و في نفس الوقت ضيقه من عند الخصر مع عقد خفيف و كعب عالي او فلات هاللوك مناسب اكثر للعزايم او الحفلات مكن تضيفين حزام و كم اكسسوار تخلين اللوك احلى و احلى انتي و ابداعاتج

التنسيق الثالث

اللوك الاخير غيرت لون الجينز و اضفت الفيست البرتقالي يعطي لون للوك لونه في الصوره الفيست وايد قوي بسبب الاضاء  الفيست الي عندي طويل في منه اللي ايي اقصر الي يوصل الين فوق الفخذ اللوك يناسبه كعب عالي او وسط 

اتمنى تكونون استفدتوا من البوست اشوفكم السبت الياي 

المزيد

My Skin Care Routine / عنايتي بالبشره

اهلين شحالكم يا حلوين ؟ بوست اليوم بتكلم عن طريقتي في عنايتي في بشرتي اولا شنو يعني انه يكون عندج روتين لبشرتج من ناحية الغسول و الكريمات و الماسكات الي تستخدمينها و تكونين مداومه عليها يعني الغسول مرتين و السنفره من مره الى مرتين في الاسبوع او ع حسب بشرتج و الماسك مره او مرتين ما اطول عليكم اخليكم مع الصور.

بشرتي كانت دهنيه قبل ما اخذ كورس الروكتان بس عقب الكورس تحولت الى مختلطه اقرب الى الدهنيه بس مب نفس قبل يقلب ويهي دهني اهون شوي لمعه بسيطه.

 الغسول من ماركة (Avene/افين) غسول خالي من الصابون مناسب للبشره الدهنيه و المختلطه ما ينشف الويه ابدا و لطيف على البشره استخدمه مرتين في اليوم.

المرطب  (Nutraderm/نيوترادرم )من بديت كورس الروكتان الين الحين ما غيرته اهو نفس المرطب وصفته لي الدكتوره عشان يقلل من الجفاف الي يسوسه الروكتان ترطيبه حلو ما يدهن الويه يرطب بعمق .

المرطب الثاني(Cetaphil/ سيتافيل ) استخدمه في حاله وحده بس اذا بشرتي صارت جافه وايد بسبب  الديفرين لانه ترطيبه للبشره الجافه و الحساسه اكثر اما الدهنيه يقلب دهني اذا زدتي الكميه شوي .

سنفرة (Stives/سانت ايفز ) هالسنفره غنيه عن التعرف اذكر عرفتها من وحده كويته ما اذكر اكاونتها بالانستقرام مدحتها و بالصدفه لقيتها في اللولو قلت خليني اجربها حبيبتها خفيفه مب قاسيه ع البشره و تنعم الويه و تتخلص من الخلايا الميته بس للاسف الفتره الاخيره صرت نادر ما احصلها طلبتها من سوق دوت كوم صح سعرها اغلى عن الي فالسوق بس ما لقيتها و ما اقدر استغنى عنها اذا شفتوها في اي مكان لا تترددون  اخذوها .

جل (Differin/ديفرين) وصفته لي دكتورة الجلديه اذا طلعت لي حبه احط منه عليها قبل النوم و اليوم الثاني تخف حجم الحبه وتبدا تتقلص و يخف الاحمرار ولانه ينشف استخدم بعده مرطب سيتافيل يرطب من قلب للامكان الجافه اقروا عنه اكثر وايد دكاتره كتبوا عنه بوستات في الانستقرام.

كريم( Skinoren/سكنورين) لعلاج اثار حب الشباب او الكلف هذا الكريم ما استغنى عنه اذا استمريت عليه لمدة شهرين تبدا الاثار تختفي و تقل مع الاستمرار و احيانا يقتل حب الشباب اقروا عنه اكثر وايد دكاتره كتبوا عنه بوستات في الانستقرام.

مزيل المكياج من غارنيه هو شبيه و بديل لمزيل المكياج بيودرما الوردي يمسح المكياج بسهوله و ما يحرق العين و يمسح المكياج المقاوم للماء .

مناديل جونسون لازاله المكياج جربت نوعين من مناديل جونسون الابيض و الاخضر و ارتحت لهذا النوع يرطب الويه و يزيل المكياج و حتى الماسكرا بسهوله .

اخيرا ترطيب الشفايف استخدم فازلين احط منه طبقه قبل النوم و الصبح اقشر شفايفي تصير ناعمه و مرطب خلال اليوم بيبي ليبس من ميبلين ترطيبه حلو خفيف و فيه حمايه من الشمس 15.

اتمنى اتكونون استفدوا من البوست.

المزيد